Furriau in sardu de su traballu originali de Silvia Bencivelli po RadioRai.
Ddu podeis agatai innoi: Rai play radio: Glossario Minimo per un’epidemia
(Is primus duus fueddus funt innoi e innoi)

3 – Sanamentu

  Sanamentu in generali bolit nai ca una personi, chi innantis fiat malàdia, no ddu est prus. Narau diaici parit fàcili a spricai it’est su sanamentu, perou sigumenti ca nci funt maneras diferentis po castiai a sa maladia, nci funt medas maneras po narai it’est su sanamentu.

  Chi imperaus su microscòpiu bieus arrogus piticus de sa carena, cun cèllulas e intessiduras [1], e podeus biri ita sutzedit in custus arrogus piticus candu unu est malàdiu e pustis si sanat, mentris chi castiaus a sa carena de s’òmini bieus ita sutzedit in generali.

  In is intessiduras cun su sanamentu, candu fait, in logu de is cèllulas chi ant tentu dannu nascint cèllulas noas e ugualis a is mortas, candu no fait, si format unu semu. Su semu amènguat sa funtzioni de s’òrganu perou est comenti e chi ddi pongat un’acònciu e issu sighit a funtzionai.

  Consideraus imoi sa carena de una persona totu intrea: innoi puru su fueddu sanamentu podit tenni sentidus unu pagu diferentis e a ddus spricai est una cosa unu pagu atrobeddada.

  Candu ascurtaus dònnia merii is nùmerus de s’epidemia de Coronavirus e de Covid19 intendeus ca nci funt is “clinicamenti sanaus”, ma ita bolit nai? Ca is chi teniant is sìntomus [2] de su Covid19, po nai callentura, dolori a is ossus e in totu sa carena, tùssiu, dificultadi a alidai etc, imoi stant beni e sunt torraus a domu. Issus podint ancora tenni aìnturu su virus e chi si circat su virus cun is “tamponis” podit essi puru chi s’agatit [3].

  Si narant invècias sanadas (sceti sanadas chentza de “clinicamenti”) is personis chi si funt chentza de duda scabbùllias de su virus: su tamponi, chi innantis fiat positivu, imoi est negativu. Si podit essi sanaus pustis de essi “clinicamenti sanaus”, poita funt sparèssius is arrastus de virus in su tamponi, ma si podit essi sanaus mancai no si siat tentu callentura o àterus sìntomus, poita ca unu podit essi sanau de s’infetu chetza de ai tentu sa maladia: custas personis funt is chi ddis narant “portadoris asintomàticus” chi podint essi cuntagiosus po is àterus chetza de si-nd’acatai. Su de is portadoris asintomàticus est unu ”sanamentu virològicu”.

  Imoi torraus a is chi ant tentu sa prumonita: issus podint essi “clinicamenti sanaus”, e “virologicamenti sanaus” ma podint essi ancora dèbilis. Nci bolit tempus po torrai cumenti a innantis, ca sa prumonita est una maladia grai e is prumonis podint tenni semus chi ddus faint cìdrinus e no faint passai beni s’ossìgenu e s’anidridi carbònica.

  Una borta sanaus, sa carena serbat sa memòria de s’infetu e produsit is anticorpus. Anticorpu est su fueddu chi eus a spricai sa borta chi benit, ma imoi ndi chistionaus po nai ca no importat chi si siat tenta sa prumonita o si siat stètius portadoris asintomàticus, is anticorpus si faint su pròpiu. Un’àtera manera po ddus fai est su vacinu, ma custa est una stòria longa e imoi est s’ora de dd’acabbai.

  A si biri!

 
Nodas

  1. Is intessiduras funt is partis chi cumponint is mermus (o òrganus, de s’aregu ὄργανον, òrganon = màchina, aina; òrganu de is sentidus) est a nai is partis de is prumonis, de is ossus o de su cerbeddu. Is intessiduras funt fatas de cèllulas e de totu su chi ddoi at aforas de issas, una trama chi ddi nant “madrixi estracellulari” totu inciusta de su “suci estracellulari”.
  2. Is sìntomus funt sa parti “clìnica” de una maladia, sa chi sa personi intendit e de chi si chèsciat cun su dotori.
  3. Imoi si pensat ca in custas personis cun is tamponis positivus no s’agatat su virus intreu e perigulosu ma arrogus sceti de su virus, chi no podit prus fai dannu ni si podit spainai.

 
 

Lascia un commento

Il tuo indirizzo email non sarà pubblicato. I campi obbligatori sono contrassegnati *