In custus tempus de pandemia is operadoris sanidàrius funt stètius una de is peus categorias fertas de s’avolotu nàscïu po mori de s’impestu, cun medas chi si funt amaladiaus e a dolumannu finsas mortus. Custu chi si presentu innoi est unu sciogu prenu de amargura de unu dotori vènetu.

de Michele Valente
presidenti de s’Òrdini de is Mèigus de Vicenza

(pigada de s’arrevista Omeca, n. 4 – Abrili 2020)

  “Is fueddus contant prus po chini ddus ascurtat chi no po chini ddus narat”. Custu dìciu de su professori miu de italianu a su liceu m’est torrau a conca in custas diis chi mòlliu Itàlia e erois funt is fueddus chi seus intendendi dii po dii, finsas a ddus ai arròscïus, de polìticus, distribudoris televisivus de tribulia e giorronalistas de s’imprenta. Totus funt cumbintus ca is natzionis europeas si bolint ispirai a su mòlliu Itàlia po binci su virus. Ma cali est su mòlliu Itàlia de sa sanidadi?
– Su chi at segau dexenas de millenas de postus-letu me is spidalis?
– Su chi at aboliu sa cuncàmbia me is arrepartus e lassau giubilai is dotoris de famìllia sena ddus arremprasai, impoberendi aici sa mexina de su territòriu, chi depiat essi su primu fronti contras a s’impestu?
– Su chi at segau is bussas de stùdiu po is spetzialisaduras?
– Chi at impostu su nùmeru serrau me is universidadis e imoi nci scudit a su sprabaxu is noulaureaus abonendi-ddis s’esàmini de abilitadura?
– Chi tenit sa nexi de ai bòfiu segai cun tostorrudesa is fundus po sa circa?
– Chi at impèlliu a su disterru millenas de dotoris giòvunus?
– Chi donat a dotoris e personali sanidàriu is prus pagamentas bàscias de Europa?
– Su chi de annus straviat centenas de millionis de sa sanidadi pùbrica a sa privada?
– Su chi amostat unu disacòrdiu de no crei intra is autoridadis regionalis e sa de su Guvernu?
– Su chi at partziu sa sanidadi italiana intra su Nord virtuosu e su Sud sperditziadori?
– Su de su stontonamentu sighiu de su Guvernu po is mesuras de cuntenimentu de s’impestu, a primu annuntziadas timi-timi e agoa detzìdias a trigadiu?
– Est su chi, a pandemia arribendi, no at pensau de allogai mascareddas de donai a sa populatzioni e pruschetotu a is dotoris, po fai de manera chi, in prus de no s’impestai issus, no si fadessint issus etotu impestadoris de is àterus?
– Est su chi no at predispostu in tempus unu percursu cumoni po afrontai s’emergèntzia?
– Su chi tenit unu nùmeru de mortus prus mannu de sa Cina, cun d-un’ìndixi de mortalla de su 10% contras a su 2-3 de sa Cina?
– Est custu su mòlliu Itàlia?

S’infermera Elena Pagliarini, stasia de fadiori, sìmbulu de sa batalla de is operadoris sanidàrius contras a s’epidemia

  Erois. In d-unu tzacarru de artivesa pàtria chi finsas a pagus diis a oi s’iat a essi discinia sovranismu, cun sbanderamentus de tricoloris me is balconis e s’Innu de Mameli trasmìtiu a arretzas televisivas unificadas a is 11 de una cenàbara a mangianu, a dotoris e infermeris ddis nant erois. Dotoris chi finsas a eriseru fiant atacaus, scutus e imputaus de dònnia mali de sa sanidadi, imoi funt erois. Epuru funt is pròpius chi ddis ant impostu su tempàriu po is abisitas (8 minutus) e is làcanas po pediri atzertamentus e apretzetus de mexinas in s’arretzeta. Poita erois? Ca s’amalàdiant e morint! Erois? No, funt vìtimas de chini ddus at custrintus a afrontai s’emergèntzia a manus nuas. Vìtimas de su sentidu insoru de su doveri e de ai onorau su giuramentu insoru finsas a sa fini. Funt vìtimas de chini at bòfiu chi andessint a si bociri de manus insoru is dotoris de famìllia chi sighint a fai su traballu me is ambulatòrius e me is domus de is malàdius. Chena mascareddas, chena guantus e chena de ainas de amparu individuali. Deu no m’intendu un’eroi poita ca sigu a fai su traballu miu mellus chi potzu. No seu un’eroi, ia a bolli scéti sa fiantza de podi traballai in seguresa. Est a pediri tropu a su mòlliu Itàlia?

  Polìticus stimaus, no si fatzais essi erois amarolla. Nosu eus a sighiri a cumbati sena arrespràmiu custa gherra, ma assumancu donai-sì is ainas po ddu podi fai.

Lascia un commento

Il tuo indirizzo email non sarà pubblicato. I campi obbligatori sono contrassegnati *