Is monumentus naturalis de Sardìnnia – 2

Furriau in sardu de s’originali, pigau de “Monumenti naturali geologici della Sardegna”, de Luigi Sanciu, geòlogu, Roberto Rizzo e Antonello Angheleddu (Bones design studio) po su Parcu Geomineràriu stòricu e ambientali de Sardìnnia

  Sigheus sa passillada a giru de sa Sardìnnia po connosci is monumentus naturalis e geològicus de s’ìsula nosta. Oi andaus a s’Ìsula de Santu Pedru, afaci de su Surcis, po biri is “Colunnas“.

Fotografia pigada de su giassu Sardegna Turismo

  Is Colunnas funt una loba de arrocas artas in mesu de mari, chi in italianu ddi nant faraglioni, nàscïas in su Mioceni mèdiu, prus o mancu 15 millionis de annus a oi. Funt fatas de pedra vulcànica, de una calidadi particulari, chi ddi nant pedra piroclàstica, de s’aregu πύρ (pýr): fogu e κλάστος (klástos): arrogu, poita ca nascit candu su cinixu, is arrogheddus de arroca e de lava bessius da un’erutzioni vulcànica s’apoddant apari e pustis, sendi grai meda, cun su tempus s’apoddant e faint una calidadi de pedra noa.

  Un’ateru nòmini prus spetzìficu de custa pedra piroclàstica est ignimbrite, chi benit de su latinu de is fueddus ignis: fogu e imber (genitivu imbris): àcua pròina, giai chi iaus a podi nai ca su vulcanu “fait proi fogu”.

  A primìtziu is colunnas no fiant a solas in su mari cumenti a oi ma fiant parti de una costera antiga, ma su mari e su bentu a pagu a pagu dd’ant papada e funt sighendi a si-ndi papai totu. Difatis fintzas is colunnas, artas in orìgini 16 m asuba de su mari, me is annus ant sunfriu po sa fortza de su mari e su bentu e unus cantu annus a oi una nd’est fintzas arruta e nd’est abarrada sa mitadi scéti.

  Is colunnas funt oi su sìmbulu geològicu de s’Ìsula de Santu Pedru, ma s’ìsula tenit medas àterus logus puru de importu mannu po sa geologia.

Lascia un commento

Il tuo indirizzo email non sarà pubblicato. I campi obbligatori sono contrassegnati *