Fotografia liada de Pixabay

  In custas diis de tristura e axiu su chi mi parit chi siat de importu est de castiai aìnturu de nosu etotu, de no perdi s’assèliu, sa fiantza, s’ànimu, sa firmesa, sa passièntzia, su domìniu de sei, de tenni is nèrbius firmus, sperendi in Deus e mancai sendi unu tanti befianus. Po custu, pensu chi potzat essi utilosu a torrai a ligi sa poesia “If” de Rudyard Kipling. Ddu podeus fai a primu in s’originali ingresu e, po chini bolit, bortada in italianu. Dda podeis agatai in s’arretza a custu liòngiu.

  Deu si-dda contu furriada in campidanesu. Mi parit chi aici pighit unu sentidu nou.

Si arrennescis a tenni sa conca a coddu candu totus a ingìriu de tui
dd’ant pèrdia e donant sa nexi a tui,
si podis tenni fiantza in tui etotu candu sa genti dudat de tui,
ma arrexonas puru de is dudas insoru:
si ses bonu a abetai sene ti fadiai po s’abetu,
o sendi tragallau, a no contracambiai is tragallus,
o sendi tirriau, a no lassai logu a sa tìrria,
sene parri perou tropu bonu, ma nimancu tropu sàbiu;

Si podis bisai, sene fai de is bisus is meris de tui;
si podis pensai, sene fai de is pensamentus su fini tuu,
si arrennescis a atobiai sa Bona Sorti e su Sciacu
e a manigiai custus duus impostoris a sa pròpiu manera:
si arrennescis a poderai ascurtendi sa beridadi chi as nau
furriada a fàula de trasseris chi ndi faint unu latzu po is bovus,
o a castiai is cosas chi ddis as donau sa vida, destruias,
e a t’incrubai e a ddas torrai a fabricai imperendi ainas spaciadas.

Si podis fai unu muntoni de totu sa sienda tua
e dd’arriscai cun d-una tiradura de arriali sceti,
e perdi, e torrai a cumentzai de bellu ’e nou
sene mai musciai unu fueddu asuba ‘e sa pèrdida cosa tua:
si ses bonu a obligai su coru tuu, is nèrbius e is burtzus
a poderai puru candu funt stasius
e in custa manera a arresisti candu aìnturu de tui no nc’est prus nudda
franca sa Voluntadi chi si narat “Arresistei”!

Si arrennescis a chistionai a is arrufas e a mantenni sa virtudi tua,
o a passillai cun is Urreis, sene perdi sa bonesa de sèmpiri
si is enemigus e is amigus stimaus no arrennescint a t’ingolli
si po tui dònnia personi est de importàntzia, ma nisciunu tropu:
si arrennescis a preni dònnia minutu inesoràbili
donendi bàlida a donniunu de is sessanta minutus
de tui est sa Terra e totu su chi issa cuntenit,
e – su chi est prus de importu – tui as a essi un’Òmini, fillu miu!

Lascia un commento

Il tuo indirizzo email non sarà pubblicato. I campi obbligatori sono contrassegnati *