Mazinga Z: Deus o Dimòniu? – I
Su dotori Inferru, unu scientziau macu chi bolit cunchistai su mundu, mandat un’emissàriu suu, su Baroni Ashura, a bociri su professori Juzo Kabuto, s’ùnicu in su mundu a sciri de su pranu macu cosa sua. Ma su professori Kabuto, chi in passau iat scobertu su liòngiu metàllicu prus tostau de su mundu, su Super Liòngiu Z, e sa propulsioni a fùndida foto-atòmica, at in s’interis fabricau un’arrobotu gherradori stravanau, cun sa tenta de s’oponni a su scientziau malu. Su professori Kabuto perou bolit chi siat nebodi suu Koji Kabuto a si pigai sa faina de condusi a Mazinga Z, su nòmini de s’arrobotu giganti. Ma at a essi bonu Koji a controllai s’arrobotu chi s’ajaju dd’at arregalau? Mazinga Z at a essi unu Deus sarbadori o s’at a furriai in d-unu Dimòniu destruidori?
sighit …
Fortzis no b’intrat nudda, ma cummenti ddu ias a nai su generi chi is inglesus nant sci-fi? Fingidura scientifica? E ita ias a nai de su cyberpunk? https://pastebin.com/7GWp3R7P
Saludi Chimera. Chena de depi circai tropu furriaduras stramas, creu chi si potzat fai unu cràchidu de s’italianu simpri meda cun is fueddus chi teneus in sardu, a tipu “pantascièntzia”. Po cyberpunk sa chistioni est unu pagu prus traballosa, giai ca totu is lìnguas, creu, imperant s’ingresu chena de ddu tradusi. “Cibernarrebellia” (e s’agetivu “cibernarrebellu”) o “arrebellia cibernètica” funt tropu cumpricaus po cumpeti cun s’imediatesa de cyberpunk!
Saludi a tui! Interessanti meda! Fortzis tenis arrexoni, mancai deu ia a ai usau s’inglesu sci-fi (a sa fini su generi cummenti du connosceus est nàsciu me si chistionat s’inglesu) ma fantascièntzia si cumprendit mellus. Propria cosa po cyberpunk! Gratzias!