de Danix Sanna
su 6 de gennàrgiu 2018
In su calendàriu s’agatant unas cantu festas chi dònnia annu bessint in d-una dii diferenti: s’arrexoni de custu fatu est chi custas diis funt acapiadas a sa dii de Pasca Manna chi bessit a segunda de sa luna.
Sa dii de Pasca Manna, comenti iant stabiliu in su Concìliu de Nicea in s’annu 325 pusti-Cristu, est su domìnigu apustis de sa primu luna prena de beranu.
Duncas, po sciri cali est sa dii de Pasca Manna de su 2018 depeus pigai po arreferimentu sa primu dii de beranu, chi est su 21 de Martzu (echinòtziu de beranu), e biri candu bessit sa primu luna prena de beranu: ocannu est sàbudu 31 de Martzu, duncas Pasca Manna est su primu de Abrili:
| 21/03/2018 | Primu dii de beranu – echinòtziu de beranu |
| 31/03/2018 | Primu luna prena de beranu |
| 01/04/2018 | Primu domìnigu apustis de sa primu luna prena de beranu – Pasca Manna |
Una borta chi scieus candu est Pasca Manna, podeus sciri candu funt is diis arreligiosas acapiadas e finsas is diis de Carrasciali.
Po su Carrasciali, sa dii de pigai in cunsideru est mércuris de Cinixu, est a nai sa primu dii de Carèsima, chi est 46 diis agoa de Pasca Manna e chi ocannu est su 14 de Friàrgiu; agoa teneus “Martis de agoa”, e is àteras festas de Carrasciali, e apustis totu is diis de Carèsima.
Festas de Carrasciali
(o Carnevali, Crannovali, Segada ‘e petza, Carrasegai, Carrasegare, e àteras maneras de nai)
| dii | nòmini in Sardu | nòmini in Italianu |
| 08/02/2018 | Giòbia de lardajolu | Giovedì grasso |
| 11/02/2018 | Domìnigu de agoa o Domìnigu de Carrasciali | Domenica di Carnevale |
| 13/02/2018 | Martis de agoa o Martis cardajolu | Martedì grasso |
Calendàriu de Carèsima e de Pasca Manna
| dii | nòmini in Sardu | nòmini in Italianu |
| 14/02/2018 | Mèrcuris de Cinixu: cumentzu de sa Carèsima (46 diis innantis de Pasca Manna) | Mercoledì delle Ceneri |
| 18/02/2018 | Primu domìnigu de Carèsima | Prima domenica di Quaresima |
| 25/02/2018 | Segundu domìnigu de Carèsima | Seconda domenica di Quaresima |
| 04/03/2018 | Su de tres domìnigus de Carèsima | Terza domenica di Quaresima |
| 11/03/2018 | Su de cuatru domìnigus de Carèsima | Quarta domenica di Quaresima |
| 18/03/2018 | Su de cincu domìnigus de Carèsima | Quinta domenica di Quaresima |
| 25/03/2018 | Domìnigu de is Pramas: cumentzu de sa Cida Santa | Domenica delle Palme |
| 29/03/2018 | Giòbia Santa: s’Ùrtimu Cena (acabu de sa Carèsima) | Giovedì Santo |
| 30/03/2018 | Cenàbara Santa: sa morti de Gesùs | Venerdì Santo |
| 31/03/2018 | Sàbudu Santu | Sabato Santo |
| 01/04/2018 | Pasca Manna: Gesùs arresuscitau | Pasqua |
| 02/04/2018 | Pasca de s’Àngiulu | Pasqua dell’Angelo |
| 13/05/2018 | Su Sinnadroxu de Gesùs (6 domìnigus apustis de Pasca Manna) [*] | Ascensione di Gesù |
| 20/05/2018 | Su Spìridu Santu (7 domìnigus apustis de Pasca Manna) | Pentecoste |
| 27/05/2018 | Sa Trinidadi (8 domìnigus apustis de Pasca Manna) | Santissima Trinità |
| 03/06/2018 | Corpus Dòmini (9 domìnigus apustis de Pasca Manna) [*] | Corpus Domini |
[*] Noda: is diis giustas de Su Sinnadroxu de Gesùs e de su Corpus Dòmini funt 39 diis e 60 diis apustis de Pasca Manna, totu e is duas funt de giòbia, ma de su 1977 in Itàlia ddas ant mòvias a su domìnigu apustis.
